溫哥華街坊會 Vancouver Kaifong Association

7月8號當日我哋一行廿多人參加館方特別提供嘅廣東話導賞團，重點介紹返歐洲移民黎到溫哥華前嘅一段原住民嘅歷史，同埋我哋應該點去看待佢哋現有嘅文化。 感謝 Museum of Vancouver 為參與嘅街坊提供咁多有意義嘅資料，等新黎嘅香港人都可以瞭解更多關於新居住地背後嘅故事。

繼續閱讀…

喺6月25號我哋一行三十幾人再度造訪 Mount Seymour，希望行到 Dog Mountain Trail。可惜天氣仍然未夠熱，路段仍然封閉。不過我哋都行到能夠飽覽全大溫景色嘅山頂，大家都好開心影咗好多相！希望下年可以行得到 Dog Mountain 啦！敬請留意我哋未來嘅行山活動 相片Credit：@lonelycloud93、Miss Y

繼續閱讀…

我哋第一次嘅「香港人社區空間」已經喺六月十一日假本拿比 Tommy Douglas Library 嘅社區1號室完滿結束。 溫哥華街坊會由兩年多前開始，已經舉辦多個活動及講座，基於疫情所限多數活動只能透過網上進行。呢次係「香港人社區空間」第一次同各位街坊以實體方式交流。 「香港人社區空間」顧名思義，係溫哥華街坊會爲香港人所設嘅一個社區空間。目的除咗係提供所有街坊一個機會去互相認識、擴闊人脈、鼓勵街坊互助，發揚街坊會精神之外，亦會邀請嘉賓提供針對同新移民相關議題嘅講座，希望能進一步令新街坊更容易適應加拿大溫哥華呢個新環境同享受新生活，秉承街坊會嘅宗旨：傳承、接納、共融。 除左歡迎新義工，當日亦有任職電工嘅義工 Way 替人修理小家電、中醫師 Dennis 講解身體各種痛症及治療方法，另外身爲父母嘅街坊Rachel 分享心得，協助改善親子相處方式。鳴謝 飲湯思源 送出湯包特別禮盒裝畀嘉賓。 溫哥華街坊會係非牟利機構，一切運作都係靠義工慷慨出力支持，今次嘅「香港人社區空間」亦好歡迎同多謝新參加嘅義工，一齊壯大香港人社群。

繼續閱讀…

6月3號我哋一行二十位街坊參加咗華埠掌故館同埋由掌故館職員帶領嘅唐人街導賞，真係知多咗好多華埠嘅歷史，仲聽到一啲關於唐人街嘅冷知識添！今次係華埠掌故館為我哋街坊會特別安排嘅導賞團，除咗參觀咗富有故事性嘅華埠掌故館，仲參觀咗獨家景點陳潁川堂同沿住唐人街一邊行一邊聽故仔。華埠掌故館嘅入面一切都好有心思，例如用好多故事去帶出個歷史，又有豐富嘅展品，仲有AR 技術同體驗一下喺周耀初影相館影相，要逐樣睇哂真係要下次再去先得喇。之後我哋去咗隔離嘅陳潁川堂，參觀不同嘅活動室同埋文物館，而好多人最鍾意嘅就係嗰個中西合璧嘅大禮堂，特別係個圓拱形彩色天窗！然後我哋跟住掌故館職員帶我哋遊一次唐人街，睇住幾十年前甚至一百年前嘅圖片對比吓現時嘅建築物，發現好多都真係無乜點變，保養得好好，再聽埋當年嘅典故之後，望返唐人街真係有另一番體會。今次十分感謝華埠掌故館做咗咁多資料搜集為我哋帶黎咁豐富嘅導賞團，希望之後有機會再搞過！

繼續閱讀…

好開心見到五十幾位不同背景嘅街坊黎到參加尋日嘅活動！尋日除咗坐定定聽講座分享，仲有集體運動環節。中間亦提供時間畀參加者同嘉賓 networking，更提供咗好加拿大式嘅茶點招待，過程非常生動有趣。 希望各位嘉賓所提供嘅資料同埋個人分享會幫助到大家未來搵工，如果搵到好工，記得同我哋講聲呀！ 再次多謝以下咁多位嘉賓嘅分享： 加拿大就業情況及資源：Mr. Michael Yue, Director, Partnership Development. Vancouver Community CollegeMs. Cindy Chan, Former VCC staff 人事專業分享求職注意事項：Ms. Jenny Liu, HR, CPHR designation 求職期間的身心健康：Prof. Siu Yin Cheung, 體育心理學榮休教授 抵加中醫師入行個人分享：Mr. Henry Hung, 註冊中醫師 移加港中醫 EC in Canada 鳴謝 VCC 借出場地、SFU RADIUS 支持，仲有 飲湯思源 贊助嘅精美紀念品湯包禮盒，喺度謹代表本會多謝各單位的支持。 錯過咗？唔喺溫哥華？重播連結喺呢度： Part 1 https://youtube.com/live/Q0KFhxtAmaI?feature=share Part 2 https://youtube.com/live/ynFICpg0aIY?feature=share

繼續閱讀…

喺5月20號一行五十幾位街坊去咗Rice Lake 同Lynn Valley行山，天氣非常好，風和日麗。全程行咗3個鐘左右，難度偏易，好適合一家大細。如我哋嘅領隊Edward所講，我哋主要都係想介紹俾各街坊知唔同嘅行山路線，等大家對呢條路線有所認知，下次就可以自己再嚟慢慢行欣賞沿途景色。 如果大都想體驗唔同嘅行山路線，又或者認識多啲街坊，記得下次報名參加我哋嘅行山活動！

繼續閱讀…

二月五號我哋帶住廿零位街坊一齊去咗 Mount Seymour 玩 #Snowshoeing，好多街坊都係第一次上山玩 #雪鞋，多謝經驗豐富嘅 Winnie 姐姐帶隊，天公造美，場地有雪但係揸車上去無乜難度，一行人順利準時到埗，攞齊雪鞋簡單講解咗路線就開始沿住路徑行走嘞。 雖然有唔少人係初次行雪鞋，但大家都愈行愈起勁，甚至臨時話想行遠少少添！行咗成個零兩個鐘返到起點，大家去咗餐廳醫肚。嘢食就又貴又普普通通啦，不過大家都好需要補充能量。傾下傾下竟然搞到下晝三點幾，半日嘅活動變咗大半日，睇到街坊都好盡興，小編希望下年冬天街坊會可以舉辦更多同雪有關運動啦！

繼續閱讀…