by 會長 Henry

呢輪為《毒舌大狀》北美首映搵贊助嘅時候，有時對方都會問我：

「你係咪全職搞街坊會？」

街外靠同路人維生者眾，好難怪人哋以為我搞呢個會都係為咗搵著數。之前我嘅香港人鄰居都聽我解釋咗好耐，至肯相信我真係「無好處都去搞街坊會」。

講真，我埋頭搞咗兩年，又真係無乜機會同街坊分享我嘅真正職業。我其實係一個全職自由業認證翻譯員。搞街坊會主要因為我自問有能力、抽到時間、經濟上又容許我任性（多謝老公）、同埋我知道自己定嘅方向（睇返我地口號「承傳、接納、共融」）係能夠幫到甚至改變到香港人社群嘅。

今年開始，街坊會進入咗一個新階段：成為一個註冊 NGO（呢度其實叫 not-for-profit）組織。我、Guy 仲有同屬元祖級成員嘅 Jacky 三位成為首屆 Directors。註冊街坊會主要係為咗三樣嘢：

一、名份：要認真去搞呢個平台，始終都要有個正式嘅組織登記。除左可以擁有官方銀行戶口，需要多一個人簽名管數、申請各級政府同機構資助、有名義同本地機構合作、租場平啲、買保險又平啲，仲可以為新移民義工寫推薦信，證明佢哋有加拿大嘅本地經驗，何樂而不為？

二、開支：我哋成日好想做年度計劃，但無資源之下，永遠只能見步行步。兩年黎一路以「零筆直」運作其實真係好攰。另外，文具、器材、租場地、物資、未來希望俾到嘉賓嘅車馬費、運輸、儲存、租地址、行政申請費等樣樣都係錢，義工借出、拉上補下、甚至要倒貼亦對佢哋唔公平；而且，我亦唔想街坊會被貧窮限制想像，希望做到多啲長期活動或者更容易負擔嘅活動去畀街坊參與。口號「承傳、接納、共融」唔係白嗌，但係要做嘅嘢係好多好漫長，無足夠資源可能只會令個會原地踏步。

三、義工：我喺加拿大做義工果陣，每次對方一定問你要唔要返車費，送件 T Shirt 畀你著係基本，間中仲有 pizza 食，活動完左仲有 appreciation dinner 免費擦一餐。雖然我唔介意貼錢搞活動（黎緊慶功宴又係我哋三個 Directors 私人請），但唔代表其他義工都應該好似我哋咁駛錢，尤其未必有太多錢嘅新移民，一路已經付出心機、時間不特止，仲要出埋車錢、飯錢、仲要照俾活動費用。我相信，義工應該有相應嘅認可先至留到人，街坊會將來先可以有人肯承接。

今次街坊會好好彩得到電影發行邀請合辦首映，亦都係一個契機可以俾社區同街坊分擔我哋嘅付出；另外一樣嘢係，街坊會既然有官方地位，咁就可以試行「會籍計劃」，等付出少少會費參加計劃嘅街坊，可以享用到本地商舖提供嘅優惠，撐起香港人嘅經濟圈，壯大香港人社群，呢啲錢亦可以每年幫街坊會喺財政上「打底」。

多謝街坊一路以黎嘅支持同信任，好希望黎緊嘅首映同埋其他活動可以見到大家。如果大家有任何實在嘢（例如迷你倉、會計 etc）可以支持街坊會，亦可以 DM 我哋。