6月3號我哋一行二十位街坊參加咗華埠掌故館同埋由掌故館職員帶領嘅唐人街導賞，真係知多咗好多華埠嘅歷史，仲聽到一啲關於唐人街嘅冷知識添！今次係華埠掌故館為我哋街坊會特別安排嘅導賞團，除咗參觀咗富有故事性嘅華埠掌故館，仲參觀咗獨家景點陳潁川堂同沿住唐人街一邊行一邊聽故仔。華埠掌故館嘅入面一切都好有心思，例如用好多故事去帶出個歷史，又有豐富嘅展品，仲有AR 技術同體驗一下喺周耀初影相館影相，要逐樣睇哂真係要下次再去先得喇。之後我哋去咗隔離嘅陳潁川堂，參觀不同嘅活動室同埋文物館，而好多人最鍾意嘅就係嗰個中西合璧嘅大禮堂，特別係個圓拱形彩色天窗！然後我哋跟住掌故館職員帶我哋遊一次唐人街，睇住幾十年前甚至一百年前嘅圖片對比吓現時嘅建築物，發現好多都真係無乜點變，保養得好好，再聽埋當年嘅典故之後，望返唐人街真係有另一番體會。今次十分感謝華埠掌故館做咗咁多資料搜集為我哋帶黎咁豐富嘅導賞團，希望之後有機會再搞過！