香港人社區空間 (2024年4月)
0421 社區空間 –
太極與正念工作坊
「姿勢決定命運」聽落好似好誇張，可能你會覺得姿勢只係微不足道，最多只會影響外觀，但其實係可以改變一個人嘅心理同氣場。有不少學者都進行過研究，證實身體能夠牽動意識，當你可以掌握自己嘅姿勢，你就能夠掌握提升自信心、自我賦權、以及抗逆能力嘅關鍵。
工作坊導師 Patrick 將會以太極傳統背後嘅哲學及武術邏輯，講解身體同意識之間微妙嘅關係，並帶領參加者通過太極拳中嘅單式及對練過程，學習如何透過調整姿勢，加強自我賦權 (Self-empowerment) 同提升自己嘅抗逆能力 (Resilience)。
工作坊可以幫你：
- 改善姿勢以加強自我賦權及提升抗逆能力
- 了解筋膜系統對身體嘅影響
- 學習放鬆放空、身心靈互相溝通技巧
- 感受調整姿勢後嘅即時效果
主講嘉賓: Patrick Han
現為 Erickson Coaching International 認證專業教練 (Erickson Certified Professional Coach) 及專業團隊教練 (Erickson Certified Team Coach) ，並研習內家拳 (太極、形意、八卦) 超過二十年，擅長結合教練合作與武術運動，協助服務對象探索疑難雜症的根源、尋找解決辦法、重新連結身心靈以達致平衡，以發揮最大的個人及專業潛能。除了提供教練合作服務、教授武術及硬筆毛筆書法外，Patrick 亦會應邀為大專院校提供訓練及工作坊活動。
日期：4月21日 (星期日)
時間：3:00pm – 4:30pm
地點：列治文中環廣場2樓蒼生覺知武學 (Unit 265, 4231 Hazelbridge Way, Richmond)
2023-07-16 香港人社區空間
第二次嘅香港人社區空間活動嘅反應非常熱烈！近50人黎到參加交流，一路食pizza一路結識新朋友，見到好多新街坊都學到加拿大生活小技巧主動出擊交談，邁出新生活嘅第一步真係非常令人開心！同場亦有唔少舊街坊專程黎到希望認識下新黎嘅香港朋友，伸出咗互助第一步。
當然戲肉就梗係街坊 Guy 嘅加拿大法語文化講座喇！雖然好多街坊都扮唔識，但係其實有啲都講得兩下嘅！希望今次係一個好嘅開始，等大家可以學到加拿大嘅第二語言。
Miss咗？唔緊要，我哋有 IG LIVE: https://www.instagram.com/p/CuxkuIthK-M/
2023-06-11 香港人社區空間
我哋第一次嘅「香港人社區空間」已經喺六月十一日假本拿比 Tommy Douglas Library 嘅社區1號室完滿結束。
溫哥華街坊會由兩年多前開始，已經舉辦多個活動及講座，基於疫情所限多數活動只能透過網上進行。呢次係「香港人社區空間」第一次同各位街坊以實體方式交流。
「香港人社區空間」顧名思義，係溫哥華街坊會爲香港人所設嘅一個社區空間。目的除咗係提供所有街坊一個機會去互相認識、擴闊人脈、鼓勵街坊互助，發揚街坊會精神之外，亦會邀請嘉賓提供針對同新移民相關議題嘅講座，希望能進一步令新街坊更容易適應加拿大溫哥華呢個新環境同享受新生活，秉承街坊會嘅宗旨：傳承、接納、共融。
除左歡迎新義工，當日亦有任職電工嘅義工 Way 替人修理小家電、中醫師 Dennis 講解身體各種痛症及治療方法，另外身爲父母嘅街坊Rachel 分享心得，協助改善親子相處方式。鳴謝 飲湯思源 送出湯包特別禮盒裝畀嘉賓。
溫哥華街坊會係非牟利機構，一切運作都係靠義工慷慨出力支持，今次嘅「香港人社區空間」亦好歡迎同多謝新參加嘅義工，一齊壯大香港人社群。
