學園 fine dining
小編早兩日去咗間幾特別的餐廳，特別嘅唔係食物或裝潢，而係佢係一間教學的餐廳，講緊嘅係Vancouver Community College 嘅 JJ’s Restaurant。
每星期二、三及四晚上 6:30 都有 fine dining setting 嘅 Chef’s Table，食物的預備、煮調、擺盤、服務全都是學員一腳踢合力完成，導師在場指導。唔好以為佢地係學員就揸流攤，食品同服務都有板有眼，當然同真正的 fine dining experience 有段距離，但作為學員來講，所有野都合格有餘。
$55 有五道菜，菜式係餐廳自己設計（即係 Omakase 啦），每次都不盡相同，而每道菜都非常精緻，可以睇得出佢地都幾花心思去設計。
今晚的第一道係粉狀的 Foie Gras 配 peach puree，食起來口感很特別的鵝肝，起碼我真係未試過這樣子的鵝肝。
第二道係將煙三文魚用很薄的帶子捲住，配上羅勒醬汁，很醒神的一道前菜。
第三道係鹿肉配上有牛尾精華的tart，鹿肉很嫩滑，慢煮的程度很適中，不過那個 tart 仲好，味道很豐富，其實我都估唔到到底裡面有甚麼，只知道係燉牛尾的精華。
第四道係羊二食，中間係羊肩肉，右面係用煙肉捲住羊肉再煎，兩種不同味道，很有趣。左面係疊起的白蘿蔔，唔知係咪吸收了醬汁所以味道濃郁。
最後的甜品係 Tiramisu 加 咖啡雪糕，兩件都係餐廳自家製作的，Tiramise 做得唔錯，可惜雪糕比較平淡。
雖然作為 fine dining 佢同真 fine dining 都仲有一段距離，但以 $55 來講唔算貴，而且當係俾實際工作經驗同鼓勵學員係值得支持，話唔埋你以後會見到佢地出來會獨當一面也不定呢。
留意你可以俾小費，小費係會俾番學校作支援 VCC Foundation fund。如果未能安排晚餐的話，JJ’s Restaurant 都有午餐，$35 三道菜，亦是由學員合力營運的。
Dineout Vancouver
今年的 Dineout Vancouver 會在1月20日開始至2月5 日，這個每年年頭餐飲業淡季而衍生的節目已經超過20年歷史，而且是加拿大其中一個大型的飲食節。
參與的餐廳都會自訂一個比正價便宜的套餐（通常都係3 course）作招徠，而內容通常都是餐廳最出名的食品，原則上就算是一個小型的 Tasting Menu。對唔會經常出外用膳嘅食客來講，以便宜1/3 至半價的價錢試到比較高檔次的餐廳如 Bacchus、Black + Blue 的菜式其實都划算。不過今年大部分高檔餐廳訂價是 $55 至 $65 一位的 3-course 套餐，老實講比之前一兩年貴了不少。當然，裡面仍有很多平民的選擇，如連鎖店Earls、Tap & Barrel、Cactus Club 等都有 $40 以下的晚餐 。
此外，Dineout 亦會舉辦一些特別的event，數年前小編參加過 Vancouver Aquarium pop-up，食物講不上驚喜，不過當去水族館一遊亦不錯。可惜在唔係在水族箱前用餐，否則其實可以變成一個話題打咭的 event。
今年第一年有米芝蓮，但有參與 Dineout 的一星餐廳就只有 Main 街的 Burdock & Co.，可能其他的已忙到不用Dineout 去招徠客人吧。
小編早幾年都會特地 book Dineout的餐廳，但年復一年 Dineout 期間餐廳都因為客人太多而令食物及服務質素都變得參差，所以現在實在不寄厚望或傾向 Dineout 完結前才去（部分餐廳會在完結後依然提供 Dineout 套餐的）。
各餐廳Dineout menu，訂位同查看特別event 可看官網：
https://www.dineoutvancouver.com
（截圖來自官網）
不只是黑森林蛋糕
呢間係太太無意中發現的，雖然駕車經過很多次，但沒有一次會落車入去。原來很有驚喜。
法文名FORÊT NOIRE 即係黑森林蛋糕，但我覺得佢比見慣見熟的黑森林蛋糕更精彩。
糕餅都不太甜，很精緻，食完不會有飽滯的感覺。橙色那個芒果mousse 蛋糕好香芒果味，內裡加入了好似係passion fruit，感覺很精新。
不過其實它的周邊食品都很有趣，好似這唇膏朱古力及 Love 朱古力禮盒，買來送俾人一流。
不過最耀眼的，都算是Macaron了。
不過唯一要彈的，就是貴。一件單人蛋糕都 $10，買三幾件已經是別人的一整個6吋蛋糕了，不過講味道，佢真係無得輸，大家可以試試。
FORÊT NOIRE PATISSERIE
236 West Broadway, Vancouver.
瑰麗小店 Melo Patisserie
在 Main 及 E 8th Ave 有一間不甚起眼的法式小餅店叫 Melo Patisserie，不過我可以講，佢係全溫哥華最好食的法式西餅三甲之內，應該無異議。
Chef Melo 很平易近人，經常見佢由餅房走出來跟顧客傾計，很好笑容的。而他作的西餅及蛋糕，你應該食完都會滿口笑容離開。其實我最愛的，是他的甜點不會過份地甜及膩，味道及份量都恰到好處，不會令你太飽，但又可以滿足你第三個胃的要求。有人講他的 crossiant 全溫哥華最好的，我不知道，我反而最喜歡他的 financier(金磚蛋糕?)，配咖啡簡直一流。當然，你都可以預訂生日蛋糕，個樣真係靚到送俾人絕對唔會失禮。
店子裡面裝潢亦非常漂亮，早前天花倒吊了很多乾花，感覺好似花店。前兩日再去，乾花走了，代之而是一個個吊住的熱氣球模樣的公仔，非常可愛，似個遊樂場一樣，這種精緻細心及品味，真係要跟法國/法系人學習。
那條街最近因為工程而攪到烏煙瘴氣，大家去時要小心一點，要泊車在附近的橫街泊就可以。
Melo Patisserie
https://melopatisserie.com
[原文在2021年7月8日在街坊會MeWe group 刊登]
不一樣的越南店 Hanoi Old Quarter Restaurant
Victoria Drive 有好多越南店，雖然每一間都有佢代表的食品，但好多都只係有普通裝修、白光燈同基本檯凳，食完就算，反而呢度感覺好cozy 好舒服，同一般越南店好唔同，食落更有 feel。
食物方面，越南菜唔一定係牛河檬粉。在 review 中見到呢個黃薑魚柳好多好評，所以就試一下。佢面頭好多刁草同蔥，雖然好似好簡單的一道菜，撈埋檬粉同生菜，點上有點點辣的蝦醬，好醒神好好味。
另外係雞湯河，淨係見到面頭好多蔥都覺得好醒神，雞好嫩滑完全唔鞋，湯的味道好特別，唔錯。
最後叫了呢個好少見的蛋咖啡，係呀，打均了的蛋黃加越南咖啡。來時用熱水座住隻杯保溫。可惜我覺得太甜，可能多左錬奶，如果無咁甜就更加飲到蛋的嫩滑，不過又奇在呢樣野又幾夾，感覺仲滑過 cappucino。
如果大家覺得普通的越南菜有點悶，可以來試一試，或者你會改觀。
Hanoi Old Quarter Restaurant
5207 Victoria Dr, Vancouver, BC V5P 3V4
604-327-6789
抵食的聖誕Brunch BRUNO
新年都過左成個禮拜，而家先記得貼呢篇，真係罪過😅
聖誕節我傳統會去西餐廳食個 brunch，今年因為預計會下大雪不想去 downtown 咁遠，所以就試一試呢間在列治文新開的酒店內的餐廳。雖然我係話聖誕來，但這個 brunch 平日周末都有。
雖然每人$75 好似貴左少少，但其實多野食到痴線。單看餐牌以為係內裡選一兩樣野，原來錯了，係餐牌內所有野都有。開波個 seafood platter 有蠔有蜆有帶子仲有好肥美嘅蝦，上面係 tuna crab poke，搭埋佢個自炸薯片一齊食，好好味。蠔係90分鐘內任點任食的，非常新鮮。
之後來主菜，龍蝦三文魚的 Benny，Benny 的sauce 非常好味，好似將龍蝦都變了配菜一樣。因為之前的海鮮都飽了一半，之後的 brussel sprout 同薯仔都食唔落，而且仲有個餐廳自製的 waffle。
最後甜品來了餅乾同 macaron，加杯咖啡，嘆一下白色聖誕，都是非常爽。
雖然餐廳唔算大，但坐得幾舒適，不過就唔好期望有咩風景睇或有咩特別打咭位，係無嘅。停車場有點奇怪，指示都有點混亂，不過都是小問題，呢度都可以值得再來。
BRUNO
8499 Bridgeport Rd, Richmond, BC V6X 1R7
604-242-2750
很有 heart 的日本菜 Octopus’ Garden
初初見評價咁高係有懷疑嘅，以為又係d 騙西人的壽司，但坐落食落都覺得非常唔錯。
裝修好可愛，又好有日本居酒屋感覺，好似番左鄉下。店內好多八爪魚的擺設，唔知係咪店長 Sada 師傅的吉祥物呢？
去食日本料理其實最緊要係睇佢塊手寫板，你會見到當季最新到的鮮魚，或者廚師推介的食品，叫一定無衰。
魴鮄魚薄切，味道鮮甜，好耐無食過咁好味嘅刺身。
壽司係幾合一，$45 的師傅選的壽司，$40 的吞拿魚sampling，加埋 jumbo negitoro 碎蔥吞拿卷，好滿足。我仲加左一件喉黑 nodoguro，真係唔係成日有得食，有得食好食。
食完 Sada 師傅送左兩杯梅酒俾我地，佢真係好好客，雖然一杯酒唔駛幾錢，但最緊要有心，可惜坐唔到吧檯，可能因為吧檯都留座俾坐日本人了。
我唯一有點不滿嘅，係豉油偏咸。
店子好難預約，仲要打電話都未必有人接，想試下就要加多少少耐性了。
（去廁所一轉原來有好多收穫，你又試下睇下你見到d 乜？）
Octopus’ Garden Restaurant
1995 Cornwall Ave, Vancouver, BC V6J 1C9
