伏
琥珀。經過好幾次想去試下，等到今日下午茶先得閒去下。好好笑，尐待應喺你面前講日文，但背後佢地自己人就講韓文，唔好以為我唔知😂😂 當然，韓人整唔一定唔好食，但呢間一定係唔好食😂😂 炸粉厚，蝦無味，同去Richmond 尐香港人開嘅日本野無乜分別，但佢係主打天丼喎😂 是旦啦，雖然 Robson 間金子半之助已經無開時咁好食，我都覺得好食過佢。我睇番資料，呢間野新加坡先係本店，明哂。
閱讀更多 Read More →維多利亞生活 春夏秋冬 家居日常
Victoria 通常最熱都係得三幾個星期，仲要係至多廿幾卅度，不過今年真係大劑，六月尾連續幾日最熱可以過晒 36度，但係個 heat dome 一過咗就涼番正常番。哩度夏天唔似得香港咁潮濕，所以洗完衫可以好快晾得乾。如果住 apartment 可以响個廳度晾，咁樣又慳錢又唔駛俾個乾衣機逐次咁扯晒啲纖維，真係件衫都用得耐啲。其實呢，一年四季都可以响屋企晾衫，因為天涼時候屋內多數會開暖氣，雖然好多時都好乾燥，但係要記住用風扇移動吓啲空氣。唔覺唔覺真係可以俾少好多電費。 講開電費又講吓冬天室內暖氣嘅嘢。多數都係用電嘅，但係有啲屋同埋樓會用煤氣，舊啲嘅屋會仲係燒油。政府好鼓勵啲人着多件衫，唔好開個暖氣太大，廿一度左近就好，亦都唔好出街前較低佢，因為冬天唔開窗之餘又涷又濕對乜都唔好。 哩度夏天雨水比較少，五月到八月乾起嚟好容易有山火。因為好太陽果時出面總會有些少微風，所以响街行得耐唔覺唔覺好容易曬傷。通常九月中會開始涼，然後慢慢會多雨，所以有件有帽嘅風褸/雨褸係必需。有一件waterproof 嘅大褸就可以一直用到三四月。最好有帽嘅，因為你真係唔知佢幾時落雨，同埋啲大小雀仔會隨時「轟炸」。 Victoria 凍極有限，唔似得中部噤顛，就算落雪都唔會太大同埋至多一個星期左近就溶得七七八八。我住噤耐最大雪係1996，冬天有對防水防跣嘅 boots/鞋最好，基本上除非你冬天日日出街行好耐，唔係就可以用足好幾年。 講吓買衫褲鞋襪等等。如果唔一定要買全新嘅，哩度有好多二手市場同舖頭，仲有啲網上二手買賣 sites & apps，可以搵到又平又靚嘅嘢。去商場或者街舖買新嘢要另加銷售税12%。去二手舖好似起碼少咗5% GST (Goods and Services Tax) 定係 7% PST (Provincial Sales Tax)，唔係好記得，因為我好日都唔出吓街買嘢。 哩度嘅人衣著方面可以話好隨便，真係自己舒服就得，有啲習慣一出街就要化晒粧亦有啲着到古古怪怪，有時啲人見你件衫靚會話你知，但係未見過當面彈人嘅。 買家居用品 (dinnerware, small appliances etc) 都係可以响二手市場搵到平靚正嘅嘢。不時啲人搬屋會嫌啲嘢多過頭搵人要 (唔使錢)。本地嚟講，買賣二手好多都係基於「用得唔好嘥」，真係冇二手先去買新嘅，儘量由自己做起唔去浪費地球資源。 上面講買二手野，網上嘅有 FB market place, usedvictoria (web site), VarageSale (app with web access), kijiji (web site, possibly has app too but I don’t use this so not sure)，我知嘅係咁多，應該仲有唔少。 實體店舖有 Value Village, Salvation Army, Saint Vincent de Paul, WIN (women in need), 仲有其他冇咁大規模嘅舖頭。有啲人冇乜好做就鍾意去「尋寶」因為真係乜都有㗎。Value Village 比 SallyAnn 同 Saint Vincent 貴啲但係佢多好多選擇。早十年八年我响 Value Village 買咗件有 Gore-Tex 底嘅厚風褸，唔使十蚊著足噤多年。鍾意睇書嘅好有機會執到寶，除非有特別標價，最貴好似係七蚊一本，仲要買四送一。
閱讀更多 Read More →維多利亞生活面面觀
Victoria 係 BC 省府，位於 Vancouver Island 之末。要去溫哥華可以揸車或者搭飛機過去。車連船加埋大概三個鐘，夏天通常 7am 到 10pm 每個鐘有一班船，秋冬就隔個鐘一班，同埋尾班係 9pm。詳情可以去佢個 site 度睇：https://www.bcferries.com/ 由於島上有農有田又有倉，就算打大風到船唔行得都唔怕糧荒。喜歡靜嘅人係好啱住。哩度嘅生活節奏比較慢，喺香港忙慣咗嘅會需要啲時間適應，但係住落時間長咗就會覺得舒服自在。只係香港人食慣嘅中菜館就冇乜，所以我哋間中會出去溫哥華食嘢。最近多咗唔少有 bubble tea 嘅舖頭同餐廳，但係間中見到有啲啱香港人嘅食店開咗唔到一兩年就做唔住，因為始終本土嘅人生活習慣同埋口味都好唔同。 住果方面，喺Victoria 租和買屋/樓的價錢通常都比溫哥華平些少，但係新屋舊屋都賣得好快，而近幾個月嘅租就好似貴過溫哥華些少，實在好多本地人追唔到啲屋價，亦都有唔少長期租客因為業主想/需要賺多啲而被迫遷 (reno-viction)。最近起咗又起緊唔少新嘅樓，有好幾棟 condo/apartment 講明只租不賣。如果你 Google “Victoria BC apartment rental”, 照計可以睇到單位大細同租金。成棟都係出租嘅通常包水唔包電。有啲私人獨立屋業主自住上層出租下層嘅都唔少，但係水電就有啲包有啲每個月大家俾一半。 間單講吓唔同嘅住宅類型： Single detached house & duplex (獨立屋&孖屋）— 獨立屋好多都有起碼一個車房或者 carport (有蓋但係冇門), 但係亦都有啲用個 driveway 嚟泊車，甚至冇車位要泊喺屋前面。孖屋就通常一個大屋簷下左右兩伙，車位方面同獨立屋大同少異。屋主要負責所有维修，有草地嘅要勤剪草淋草，水電等等全部自己負責。如果租嘅話，包租嘅只負責屋本身嘅 upkeep 同 make sure 大型家電如雪柜爐頭等冇問題，出面花園草地係租客自理。 Townhouse & Condo (城市屋/排屋 & 樓層單位) — 哩啲有租有賣，要每月俾管理費，structure 嘅保險同水費已經 covered by the strata fee (管理費)，有啲包埋剪草同車位管理。管理費大約 $250 打上，有啲去到五六百蚊一個月都唔出奇，所以買哩類嘅記得問清楚。有啲只淮自住，賣價通常會平啲。 Apartment (俗稱柏文) — 哩啲多數係只租不賣，Victoria 有好幾棟新起嘅，但係租金都唔平。哩度有個 site 俾你望吓唔同地區嘅樓, 下面果個淨係租嘅: https://rentals.ca/victoria
閱讀更多 Read More →Victoria 過暑假
呢幾日睇到香港嘅奧運代表有超水準嘅表現真係睇到眼濕濕! 😭 言歸正傳，小編M選擇 Victoria 係因為氣候以及多元化嘅活動，暑假已經開始一個月有多啦！我們仨去咗邊度玩呢？！ 上山 最近行過 Joycelyn Hill Trail, 來回快行大概四小時，我哋一眾人傾下偈，Hea下食下嘢影下相，當然唔止四個鐘！夏天天氣類似香港嘅秋天，好清爽舒服，係最適合行山嘅天氣！路面情況就係乾地多石仔，所以需要穿著防滑嘅行山鞋。 (真係有跣親人嘅行山鞋㗎！) 上山上斜都有一半路程，但係波幅不算大，又有平路，沿路大部分時間都有大樹遮擋，不算艱辛。 到頂有四個view point 景色好正，下面就是 Goldstream！見到對岸最新嘅旅遊地標 ‘Malahat Skywalk’ 㖭！但係沿路沒有洗手間㗎！記住慢慢飲水，唔係搵唔到廁所喎! https://www.victoriatrails.com/trails/jocelyn-hill-caleb-pike/ 下海 另外，一個好期待嘅夏天活動就係去玩 paddle boarding，之前喺香港參加過一天親子體驗鴨仔團，當時喺海玩就大風浪啦，會較難取得平衡嘅。但是喺湖玩就正啦！湖面夠曬靜，好適合初學者玩！除此之外， 一家大細仲可以游水、 釣魚、Kayaking，喺湖邊野餐、踏單車、跑步、 散步等等！我哋最近去咗 Elk Lake！揸車去的話就要趁早，晏啲大概十一點左右開始人多好難搵車位！河邊有流動洗手間，常設嘅洗手間因為疫情關係就關閉咗，希望佢會好快開返！ Victoria 有好多湖，嚟到一定要去玩下！ https://www.victoriabc.ca/outdoor-activities/lakes/ 大家睇奧運之餘得閒睇下呢度！下星期見啦！香港人加油！    
閱讀更多 Read More →Victoria駕駛tips
唔好意思呀又遲咗！因為我未有 ideas!😫 講咩好！接續上次講租樓，不如今次講下揸車!🚙啦！利申我未有車牌㗎!😜！但係初到步嘅時候屋企老闆同我一齊嚟，我哋租咗車！ 綜合朋友及在地香港人建議嘅駕駛tips： Victoria Downtown 好多都係紅燈唔可以轉右，一定要睇清楚個牌先好轉，如果俾警察捉到，不單止食「牛肉乾」，仲會扣分。 有樣野叫 “4 way stop”, 車要停定，先到先行。 閃紅燈等於 “4 way stop”咁做。 閃綠燈可以照去，但要睇清楚。 每個省嘅閃綠燈都唔同，而喺Victoria嘅閃綠燈就係行人控制，意思就係如果有行人撳咗過馬路制，嗰個閃綠燈就會變做正常嘅綠燈，你依然可以照去，但係呢個正常綠燈亦代表好快會轉黃燈到紅燈。所以當你見到閃綠燈轉正常綠燈嘅話，就預備轉紅燈。 如果自己綠燈係左轉線，而又頭一架，不成文規定要駛出少少，大概半個到一個車位等轉左，否則後面會缽缽你。 仲有一樣好重要‼️ 綠燈左轉，一定 x 3要睇清楚對面有無車向前駛，安全情況吓先好左轉！ 仲要留意左轉果邊有無行人過緊馬路！依邊行人是最大，你都要睇緊，讓讓行人！😜 有車反而係最低等級！😂 Highway 最左線係快線，如非扒頭，不能霸住條線一直行。 有樣野叫 “HOV lane”，架車2人以上先可以用。 Victoria 冇 “HOV lane”，Vancouver 大部份嘅 HOV icon 會見到兩個人頭，就係架車一定要有兩個人以上。但係有陣時你會見到三個人頭嘅話，就係一定要三個人以上先至可以入呢條 lane。 如後面車推，即係嫌你慢，禮貌上要cut 線讓佢行先。 School zone 30km or 有 construction workers 開緊工，經過旁邊要慢駛。 如無需要，盡量唔好開高燈！（香港人好鐘意開高燈) 呢度開高燈係唔禮貌㗎! 因為通常開高燈或者不停閃高燈係想前面架車行快啲，而呢啲人有時亦都跟車會好貼，所以要小心。 消防水龍頭3米前後不能停車！(當時我哋醒唔起被抄牌了！) 切記揸車不能掂到電子用品，如電話，亦不能將電話放係腿上或可以接觸到既地方，呢樣捉得好嚴，理論上攞住野飲或食野都唔得! 仲有留意馬路側的單車專線。有時單車線，泊咗車，單車人士迫不得已駛出行車線。 如果香港嘅朋友仔係唔熟悉呢邊揸車嘅話，會建議喺呢度學番幾粒鐘先至安全喺路上駕駛。 以下係一啲教車嘅視頻可以參考下，或者你哋搵到啲更加好嘅資料 ! https://www.youtube.com/watch?v=3kb545tmUQs https://www.youtube.com/watch?v=vVl0aBBB8jY https://www.youtube.com/watch?v=ZaX9Q6nvUK8 Credit to Victoria HKers’。今次分享咗好多啦！下星期見啦！香港人平安！加油！
閱讀更多 Read More →租樓tips
暑假好多香港人過嚟，今次想同大家分享下租樓要留意嘅事項，以下係之前睇樓以及在地香港人嘅經驗之談： 先分享下一次奇特!🙄嘅睇樓經驗，該單位坐落於Shelbourne Street，整個development好新，而且有花園，單位內窗戶就正向內園，環境好幽靜，7分鐘行到去Canadian Tire，Home Depot，Save-on Foods，Fairway Market等等，而且間隔適合，空間又大，對於我初到埗又未有車牌嚟講實在十分吸引！ 但當我們離開單位，留意𨋢大堂個floor plan，就發現嗰個單位點解有兩個正門入口呢？於是返轉頭望下，發覺另外一個入口無鎖門，內裏有好多雜物，多到一開門就頂住，仲有住客喺裏面，於是詢問代理人才明白剛才在客廳見到的一道門係通去側邊嘅房，那間房出租給另外一位租客！問過朋友該單位業主應該係走法律罅，當然唔敢租！ 綜合睇樓嘅經驗以及在地人嘅分享，租樓嘅心得如下： 包水電：通常租屋都會包水，未必包電費。這個好重要，因為到冬天，這裏的水電費加起來就好似香港夏天咁貴！ 包熱水：有啲development寫明包 ‘Hot Water’，即係中央熱水，單位既沒有儲水式熱水爐，而住客亦都不需要輪住沖涼！另外，提供熱水嘅好處就係，開動熱水嘅熱能亦都係由大廈嘅中央系統供應，即由業主負責！ Heating system：單位裏面嘅heating system，係靠baseboard? (即見以下照片地腳線上面通常白色嘅長方形物體)；若果有fireplace，就是由中央媒氣供熱；前者嘅電費好貴，後者係由大廈管理費出數，則由業主負責！若果是baseboard，建議大家去Costco買熱風機好過，電費會較平！ 地氈或是地板：我個人比較喜歡地板，因為家人有鼻敏感。雖然業主交樓之前會消毒過地氈，但聽過有啲單位實在太舊，就算做完消毒都有一浸好濃烈嘅噏味！實在難頂！ 窗戶座向：若果向東/南，窗戶都會由朝早曬到晏晝，當地人就好chill， 夏天時就喺露台曬太陽；冬天就較暖，日間可以唔使成日開地熱，慳返啲電！ Double glass windows：這個好處係冬天時候單位冇咁凍！可以慳番電費！ 包車位：通常都會連車位租呀! 若果唔包，住客會泊附近路邊！不過只要唔阻礙消防通道都好少見到有抄牌。但係有新樓宇係唔包車位㗎！每個月大概要$50租位！ 包洗衣機乾衣機：部分大廈設有公共嘅洗衣乾衣機，入錢幣去操作。 雖然單位裏面空間大左亦冇噪音嘅問題，但係就唔方便，亦唔多衛生! 若果包洗衣/乾衣機，會標明 ‘laundry in suite’ 的。留意操作洗衣乾衣機係有時限㗎，入住之後要向Building Manager了解下house rules！否則鄰居投訴就老尷啦！ 包wifi：新樓宇可能包頭一年免費，若果係House可能也會包，正常wi-fi收費，以Telus為例大概 100-165 。(視乎速度） 單位所屬樓層：建議都係揀頂層！因為當地大廈superstructure主要係木製，地板好傳聲，時不時聽到「大象」行路！或有住客偏好5點前開機洗衫，住樓下就晨早畀佢嘈醒！(當然佢break左house rules係可以投訴！) 年租：部分單位寫明係短租或者以月租嘅形式，變咗住客就冇保障! 現時租管下，頭一年係 fix term，之後就係month by month。 寵物extra deposit：若果本身有寵物通常需要繳交額外嘅deposit，大約係一半嘅月租金。 消防感應器：驗樓時候屋主/Building Manager 需要示範單位內的消防感應器如何運作，以確保住客日後嘅安全！建議大家煮食時候打開窗打開門，因為爐頭上嘅抽氣系統通常十分弱雞！多少少煙就會啟動個感應器，嗰啲尖叫聲真係好恐怖！雖然可以關閉感應器，但係都嚇你餐懵！ 驗樓：驗樓時候把所有水喉開啟直到離開為止，可以觀察到來去水是否正常！另外，單位內逐一檢查所有插蘇， 帶一個小型電器去測試, 例如風筒；所有窗戶窗簾開關是否運作正常，同時單位內電錶箱嘅位置要清楚。 一梯幾伙：見到有個development，成個球場咁長，一梯多伙，人流會較雜! 睇樓時留意下鄰居單位露台或花園嘅情況，處理得亂可能會滋生老鼠昆蟲，影響到隔離！ 今次分享咗好多啦！我都覺得自己煩咗啲！下星期見啦！香港人加油！
閱讀更多 Read More →Victoria 中醫師
大家好又係小篇M!😉啊！啱啱先考完試，唔好意思今個星期遲咗出Post!😅！ 今次想分享吓係Victoria 經營中醫診所有冇作為呢？ 之前我喺香港有咩頭暈身㷫都係睇中醫為主，因為西藥!💊嘅副作用令我覺得好唔舒服。初時諗住到外國應該好難搵到中醫診所，但好感恩!🙏落地冇耐就認識咗一位香港人中醫師 —「春生堂」游醫師！而佢嘅診所仲要好就腳，醫師又好人唔會嫌我煩同我傾吓計！ 從佢口中得知香港畢業嘅中醫師只需要考取2個牌照就可以執業，包括藥師及針灸牌，而考試也不難。 依家系Victoria也有考場，詳細可以參考以下網址！ https://cchpbc.ca/ 咁究竟係島上做中醫有冇前途呢？根據游醫師意見，新開張診所需要三年嘅時間去儲客㗎！其實任何生意都需要時間去吸客嘅！ 至於供求嘅問題，島上的中醫唔太多，游醫師並不認識其他香港人中醫師。 而佢嘅病人主要來源竟然係外國人！因為佢哋及早求診，相反華人卻要到病入膏肓才去求醫！另外，現時很多保險如 ‘ICBC’ 的汽車保險及本地大學UVic每年嘅學生保險也包括中醫診金; 同時低收入人士嘅MSP每年有10次包括針灸嘅開支，病人會享補貼每次加幣$23元。 這情況下有助診所增加客源。 香港人醫師在溫哥華執業嘅優勝之處呢，除了有基本功之外，亦有英語優勢，較易同外國病人溝通！ 所以從事中醫行業嘅你可以考慮下，當然啦仍要詢問專業人士相關嘅移民途徑。 今次講住咁多先！ 好多謝「春生堂」游醫師提供以上資料！*以上靚仔照片正是游醫師啊！ 吹住咁多先！再會!🍎一定見!💪！香港人加油!💪！
閱讀更多 Read More →Victoria嘅衰嘢
又係我小編M！有關Victoria嘅好嘢真係好容易喺網絡上搵到，唔需要講咁多，不如今次講下衰嘢!👎啦！每個地方都有好有唔好，如果淨係講好嗰方面你都唔會信啦！喺我皮毛嘅知識裏在地有咩唔好嘅地方呢? 落腳申請咗MSP之後，要積極搵家庭醫生，但是這裏是求過於供，即是不夠醫生！跟香港不同的是，如果有病即刻落樓有得睇，但這裏首先向診所詢問是否接受newpatient或者Walk-in，才能夠預約！而newpatient跟walkin嘅分別係前者是固定某個醫生跟進，但後者卻不是，會由診所內當值醫生應診！ 這裏的醫生簡直係唔憂做，十個有九個都話唔接新客甚至乎walk-in，所以真係花費好多時間搵㗎！我前前後後都搞咗四個月呀！如果你係醫生嘅話不妨考慮下移民過嚟！ 試下以下網站搵醫生： https://www.cpsbc.ca/public/registrant-directory https://www.bccfp.bc.ca/connect/resources-for-patients 如果你想食中餐嘅話這裏嘅選擇真係唔多！全島只有數間酒樓、茶餐廳、川菜、台菜，食物嘅質素真係麻麻，唔能夠同對面岸Richmond比較！ 咁可唔可以買到中餐嘅食材?可以㗎！之前提過有fairwaysupermarket可以買到亞洲食材自己煮㗎！ 講完西醫下次講下中醫啦！
閱讀更多 Read More →Victoria嘅好處
又係我小編M！上次有朋友仔想多了解Victoria，咁我就估下佢想知道邊方面啦！歸納咗幾點在地感受到Victoria 嘅好處： 第一 – 自給自足：😊 唔好以為佢係一個島，只係有resort遊山玩水咁，其實呢度都好城市㗎! Victoria 喺Vancouver Island上面其中一個社區, 附近仲有Langford, Saanich, Sidney, Esquimalt等等。 每區都有大小不同的商場，例如Hillside Shopping Centre, Mayfair Shopping Centre, downtown 嘅 The Bay Centre；百貨公司有Hudson Bay；連鎖超市如 Fairway (亞洲食材最多)、Market on Yates、Thrifty Foods 等；仲未計 Costco & Walmart！另外買傢俬起居用品有Canadian Tire、Home Sense、Home Depot etc. 所以絕對係有唔少地方shopping!💍💄🎁㗎！ 第二 – Cafe： 連鎖嘅或者係小店經營都有，每區總會有幾間，得閒去chill下好爽!😎！ 就算家庭式經營嘅食物質素都唔會差！連鎖店就會推介 CaffeFantastico，咖啡特別好飲!😋！商店又不時參與community嘅活動！真心like！另外當地人都會推介去Cook street，整條街好多cafe㗎！個人亦都鍾意 Jam Cafe 嘅 Avocado Benny & waffle，同埋 John’s Place 嘅Waffle，呢啲都係去完又會再去嘅餐廳！ 第三 – 戶外活動：
閱讀更多 Read More →由一個島跳到另一個
大家好！我係小編M！轉眼移居去溫哥華 – Victoria’已有半年了！想同大家每星期定時定候分享下「由一個島跳到另一個」嘅跌跌撞撞！今個星期就會講吓點解我揀 ‘Victoria’ 啦！ 反送中運動 2019年反送中嘅運動係六月嘅時候開始，7月某日當馬騮!🐒去咗外地旅行嘅時候，忙於執拾唞吓氣嘅我!👂到一個指令 — 「你帶🐒走」！事情好似好玄咁！但係我相信係旨意！!🙌 搵代理 於是乎我着手問身邊嘅人，因為我懶，而且當時未有咁多資訊，朋友介紹下就搵到代理！ 其實都有去過加拿大升學展覽, 聯絡過其他代理，以及當時IRCC有講座順便了解下讀書移民的途徑。 約見代理 同代理講自己嘅要求： 1）我怕凍, 以天氣行先； 2) 其次就係方便戶外活動； 3）唔想咁多華人聚居嘅地方，因為想有一個良好嘅語境。就係咁樣我就揀咗 ‘Victoria’！利申從來未有踏足過加拿大！ Richmond quarantine 上年11月頭到埗，先到Richmond quarantine 14日，出關去食飯買下groceries,懷疑自己去咗那國家？！究竟自己係馬來西亞？定係新加坡？開始有點懷疑人生？！ 由Richmond 到Victoria 幾天之後揸車搭船去到 ‘Victoria’,一見到市容就愛上呢個城市！好實在咁去咗一個西方國家了！好開心興奮！知道自己會適應下來！ 下星期講咩好呢？點解我揀加拿大呢？用什麼身份申請到 ‘Victoria’？
閱讀更多 Read More →