如果街坊有留意天氣預報的話，黎緊星期二（29日）開始落雪，晚上預計更會有多達15cm 的雪。對大部份剛來溫哥華的街坊來講，落大雪似乎係好遙遠的事，不過不要看輕落雪這回事，因為落雪其實唔係講玩的。

雖然溫哥華好少會好似在我們東邊的任何一個省份咁閒閒地零下十多廿十度，落雪出街裝備不足係好難生存的。我相信大家來加拿大都第一時間已經買了大褸，所以小編唔打算詳細講。我選大褸的要點係，一定要輕及不臃腫為主，因為你可能要著住幾粒鐘，褸重係好辛苦的。

褸之外，冬天保暖最重要係保護頸部及耳朵，頸因為有很多重要血管流經，頸部好好覆蓋就可以令全身感到溫暖。而耳朵因為外露而敏感脆弱，所以亦要好好保護。你地如仲未買頸巾、ear muff 或保暖帽，好快d 買了。

衣服其實無乜特別，切勿穿得太厚太熱，因為室內有暖氣。

褲呢，其實你平時著的褲已經夠，雪褲係去滑雪著的，無人會出街 shopping 穿雪褲。怕冷的話可以穿多條打底褲，比如Uniqlo 的 heattech 打底褲。

落雪就唔好著波鞋了，任何波鞋都唔好，因為波鞋通常物料都會通風及透汗為主，一入了雪，雪在襪中融了變水就會好凍。雪鞋一般都應該是比較厚身有防水物料，最好是短boot 款，鞋底亦要有多坑紋，等可以咬住地面面積更多唔會易跣。有部份雪鞋更會有外加的釘底，雖然在市內遊走唔一定用得著，但有一對亦無彷。出街時，可以袋中帶定多一對襪替換，如果鞋入了雪都唔會太難受。

溫哥華通常一年都會落幾次雪，在12月及1 月係最大。落了多幾次雪，氣溫又徘徊在零度上下，路上就會積了不少不能融解的冰（我們叫黑冰，因為是融了的雪水混合了路上的灰塵而結成）。這些冰就一定要好小心，因為基本上除左有釘底的鞋會好少少之外，所有鞋都會跣。如果你有溜過冰你就會明白係咩一回事，應對方法，就只有好慢好慢咁盡量將重心放低咁行，或買一些有釘的鞋套套住鞋底，咁行路就會比較好少少 (amazon 搜尋ice cleats 就是這些東東）。

每一次落大風雪之前的一兩日一定係會好凍，係刺骨那種凍，所以你應該預料星期一及二早上會很凍，要穿多兩件衫了。

雖然年年都係咁講，但好多時本地市政府都對應對大雪呢件事係莫名其妙地無系統的，每年的第一次大雪通常交通都會亂哂籠，當然交通意外亦會多，行車速度都會減慢，而有時有些路積得很厚雪無剷雪車來，又有時剷單車徑的雪比行車路優先（落大雪又點會駕單車？）。又有時，Skytrain 露天路段路軌會因為積雪而令感應器失靈，又或者，某些大橋會因積雪墜落而關橋。所以都係嗰句，落雪要預多一倍時間在交通方面，同要經常查看新聞、Translink 及 Google Map 資訊，因為，天氣從來都是不能預測的。

至於各位有駕車的朋友，你有幾樣野一定要放在車內：剷車窗雪的掃(snow brush，一邊刮冰一邊掃雪)、解冰的玻璃水(windshield deicer) 同埋不入水的手套。Canadian Tire 一定有呢幾樣，如果無就好快d 買番來，因為一定要用。你的車的所有玻璃一定不可以積雪，所以雪掃係必用之物。而你泊車好一段時間後，車窗都可能結冰，玻璃水就可以好快融解。而手套，當然係俾你戴著掃雪啦。溫哥華未必會凍到死電池，但撻車的電池最好都要放一個（唔駛搭橋咖啦家陣），有熱量的食品如朱古力、energy bar 同水都不妨放一些在車內，話唔定你可能會需要用的。

今次講住咁多先，大家出門小心啦。