轉載自追新聞
小編前排去咗間幾特別嘅餐廳，特別嘅唔係食物或裝潢，而係佢係一間教學嘅餐廳，講緊嘅係Vancouver Community College嘅 JJ’s Restaurant。
每星期二、三及四晚上6:30都有fine dining setting嘅 Chef’s Table，食物嘅預備、煮調、擺盤、服務全都是學員「一腳踢」合力完成，導師在場指導。唔好以為佢哋係學員就「揸流攤」，食品同服務都有板有眼，當然，同真正嘅fine dining experience係有段距離，但以學生水平來講，所有嘢都合格有餘。
$55有五道菜，菜式係餐廳自己設計（即係西式嘅Omakase啦），每次都不盡相同，而每道菜都非常精緻，可以睇得出佢哋都幾花心思去設計。
今晚第一道菜係粉狀嘅Foie Gras配peach puree，食起來口感很特別嘅鵝肝，起碼我真係未試過這樣子的鵝肝。
第二道菜係將煙三文魚用很薄嘅帶子捲住，配上羅勒醬汁，很醒神嘅一道前菜。
第三道係鹿肉配上有牛尾精華嘅tart。鹿肉很嫩滑，慢煮嘅程度很適中，不過那個tart仲好食，味道很豐富，其實我都估唔到到底裏面有乜，只知道係燉牛尾嘅精華。
第四道係羊兩食。中間係羊肩肉，右面係用煙肉捲住羊肉再煎，兩種不同味道，很有趣。左面係疊起嘅白蘿蔔，唔知係咪吸收了醬汁所以味道濃郁。
最後嘅甜品係Tiramisu加咖啡雪糕，兩件都係餐廳自家製作，Tiramisu做得唔錯，可惜雪糕比較平淡。
雖然作為fine dining佢同真fine dining都仲有一段距離，但以$55來講唔算貴，而且當係畀實際工作經驗同鼓勵學員係值得支持，話唔埋你以後會見到佢哋出來會獨當一面也不定呢。
留意返你係可以畀小費，小費係會畀番學校作支援VCC Foundation fund。如果未能安排晚餐的話，JJ’s Restaurant都有午餐，$35三道菜，亦係由學員合力營運。
住喺其他城市嘅街坊，亦都可以查下市內職業學院通常都會有類似嘅餐廳。例如喺多倫多George Brown College嘅 The Chefs’ House，滿地可Institut de tourisme et d’hôtellerie du Québec嘅 Restaurant de l’ITHQ等大家慢慢發掘。食完記得同我哋分享返呀！
餐廳資料
JJ’s Restaurant
午餐 － 星期一至四，上午11:30至中午12:30
晚餐 － 星期二至四，晚上6:30（一輪）
請在 opentable.ca 平台預約，晚餐係要先預付。
小譚
溫哥華街坊會編輯
全文請到以下《追新聞》網站閱覽