街坊會將會喺4月15日（星期六）舉辦春季大旅行又名BC探古之旅！到時會帶領大家離開大溫哥華地區，參觀Stave Falls嘅舊水力發電廠同Fort Langley Heritage Site，去尋找本省昔日歷史的足跡。我哋將乘坐專屬嘅旅遊巴，大家無需自己揸車或搭巴士咁費時傷神，絕對適合一家大細一齊參與。大家如果喺BC探古之旅報名期間先行加入街坊會會員，呢次活動就立即有減$5嘅優惠。如果喺早鳥期間（4月5日正午12點前）成為會員兼報名，更加可享有一家大細 （最多2位大人）每人$10嘅優惠！

日期：4月15日 (星期六)
地點：Stave Falls舊水力發電廠，Fort Langley Heritage Site
上車地點：Richmond同Burnaby (見以上附圖)
集合及解散時間：Richmond – 8:00AM / 5:45PM，Burnaby – 8:45AM / 6:45PM
票價：(詳情見以上附圖)
(早鳥期間 – 4月5日正午12點前) $30 – 50 (會員減$5)
(早鳥過後 – 4月5日正午12點後) $35 – 55 (會員減$5)

註：收費包括旅遊巴車費、兩間博物館入場費及一支水。

先為大家介紹一下當日會去嘅兩個景點：

第一站係位於Stave Falls嘅舊水力發電廠，呢個發電廠已經起咗超過一百年，係一個已經退役嘅發電廠，現時係一個博物館。Powerhouse at Stave Falls係加拿大最早的水力發電廠之一，並且被列為加拿大國家歷史遺產。呢個博物館保留咗唔少發電廠嘅設施、員工嘅工具同埋生活細節，好似一個時光隧道，帶大家了解呢個地方嘅歷史。經過我哋同博物館嘅溝通，佢哋會為我哋提供英語導賞，等大家更容易理解發電廠的歷史和文化，仲會有一個非常精彩嘅發電示範環節  ！發電廠位於深山中遠離市區的Stave Lake湖邊，周圍風景幽靜，十分適合放鬆心情，享受大自然。

第二站我哋會去Fort Langley Heritage Site，呢度係BC省嘅歷史遺址之一，被譽為係BC省嘅發源地。Fort Langley喺1827年起咗之後，成為Hudson Bay Company嘅一個貿易據點，其中皮毛貿易吸引咗唔少歐洲移民到此定居。呢個地方經歷近200年嘅歲月，係加拿大歷史上嘅一個貿易重鎮，對加拿大西岸嘅開拓同發展都做出咗好多貢獻。除咗Fort Langley嘅遺址，整個鎮都有著19世紀西部小鎮嘅風情，值得大家慢慢欣賞。如果你想要了解加拿大嘅歷史同文化，呢個地方絕對係一個唔可以錯過嘅地方。