抵食的聖誕Brunch BRUNO
新年都過左成個禮拜，而家先記得貼呢篇，真係罪過😅
聖誕節我傳統會去西餐廳食個 brunch，今年因為預計會下大雪不想去 downtown 咁遠，所以就試一試呢間在列治文新開的酒店內的餐廳。雖然我係話聖誕來，但這個 brunch 平日周末都有。
雖然每人$75 好似貴左少少，但其實多野食到痴線。單看餐牌以為係內裡選一兩樣野，原來錯了，係餐牌內所有野都有。開波個 seafood platter 有蠔有蜆有帶子仲有好肥美嘅蝦，上面係 tuna crab poke，搭埋佢個自炸薯片一齊食，好好味。蠔係90分鐘內任點任食的，非常新鮮。
之後來主菜，龍蝦三文魚的 Benny，Benny 的sauce 非常好味，好似將龍蝦都變了配菜一樣。因為之前的海鮮都飽了一半，之後的 brussel sprout 同薯仔都食唔落，而且仲有個餐廳自製的 waffle。
最後甜品來了餅乾同 macaron，加杯咖啡，嘆一下白色聖誕，都是非常爽。
雖然餐廳唔算大，但坐得幾舒適，不過就唔好期望有咩風景睇或有咩特別打咭位，係無嘅。停車場有點奇怪，指示都有點混亂，不過都是小問題，呢度都可以值得再來。
BRUNO
8499 Bridgeport Rd, Richmond, BC V6X 1R7
604-242-2750
溫哥華島小介
作者：避世婆婆
除咗比較多人知嘅卑詩省府維多利亞（域多利），温哥華島上仲有好幾個大城小鎮。
Victoria 係喺島嘅最南，沿住島嘅東邊上去有 Duncan, Chemainus, North Cowichan, Ladysmith, Nanaimo, Parksville, Qualicum, Cumberland, Courtenay, Comox, Campbell River,等等。其中 Nanaimo 因為有船直去溫哥華，亞洲人都唔少。Fairway Market 有分店响 Nanaimo 但係我未去過所以唔知係咪好似 Victoria 其中兩間分店噤多啱香港人嘅嘢。
島上以 Victoria 嘅屋價最貴，跟住好似係 Nanaimo, 然後好似到 Courtenay。以我所知哩三個地方繼續起緊新屋同樓，越嚟越多人搬去住。 島中間嘅 Port Alberni 都好似多咗人住，西面嘅 Tofino 吸引唔少人去滑浪。依家網上可以搵到好多野所以不妨可以睇吓每個地方嘅情況了解多啲。
公立學院同大學方面： Victoria 有 University of Victoria 同埋 Camosun College. Royal Road University 唔知係咪公立（編註：係公立的）。 Duncan 同 Nanaimo 有 Vancouver Island University. Campbell River, Courtenay, 同 Port Alberni 有 North Island College。
Nanaimo 好似唔少越南人，多咗好多啱香港人食嘅嘢。Victoria 就多咗韓國人，有好幾間韓國餐廳，亦都有韓國人做日本餐。有間韓國人做嘅越南+韓國菜叫 Pho U，我哋不時都會去。拉麵館，泰國菜，同越南餐廳都多咗。
維多利亞生活 住屋租屋篇
作者：避世婆婆
我先想講些少歷史。話說 Victoria 喺三四十年前冇依家咁多人同埋車，果時 Langford 仲係樹林同草叢，但係已經開始多咗外地人（包括由其他省份同埋海外），有唔少三四層高嘅 apartment buildings （柏文）就喺果時（或者更早）起咗嚟租俾人住。Townhouse（排屋）都漸漸開始多。但係獨立屋仍然係最多。
以前一個家庭有起碼三個小朋友係好常見，而一間兩層至三層高嘅屋通常都會有個 in-law suite 俾老人家住，方便照顧。另外有啲屋係二戰後起嘅，只有一層半，有客廳飯廳加一兩個睡房，廚廁各一，依家已經所餘無幾，因為有好多已經拆咗重建。當然仲有其他大大小小嘅屋，有啲成百年歷史，仍有人住。
隨著近三二十年嘅人口增長，新屋/樓起唔切俾人住，政府就俾有啲比較大嘅屋將佢變成上下duplex （孖屋）或者 triplex 甚至係4-plex，各個單位有獨立廚房廁所同埋電錶。Quadra 街近 Bay街有一間, 可以上 Google 望吓。
以前 in-law suites 係唔可以好似普通柏文咁出租嘅，係近哩十幾年因為有好多人間屋度都有 in-law suite，又有唔少要靠租佢出去嚟幫補係咁升嘅地税，加上人口繼續增加，政府就開始放寬 in-law suite 嘅租務管制。最近仲多咗樣嘢，係可以將多數位於屋旁邊或者後園嘅車房改造成獨立單位出租，咁當然要政府批准咗先得啦。
但係因為實在太多人由四方八面搬過嚟 Victoria 住，依家 Langford 已經冇咗好多樹但係多咗好多屋同埋大型店舖，Victoria 市中心同埋其他地區都有唔少多層建築起緊，但係暫時仍然有唔少本地人因為租金太貴而冇屋住（好多被逼遷咁個包租可以乘機裝修完就加租）。所以依家喺 Victoria 租地方住難唔難真係要睇你想租啲乜同埋你個荷包夠唔夠銀両。
始終 Victoria 唔似得香港噤人煙密集，步伐亦都唔似香港噤急，有好多嘢由現代香港人嘅眼光睇嚟係冇噤先進。有啲租屋廣告可以喺網上面搵到，但係亦都有唔少淨係喺棟大廈前面個招牌果度，不過果類多數會係起碼廿年樓。所以要搵地方租會需要花多啲功夫。
哩幾間比較大嘅物業管理公司嘅網址：
https://www.townline.ca/rental-homes
https://www.prolinemanagement.com/for-rent/
https://pembertonholmes.com/when-it-comes-to-renting/
有最近到埗嘅香港人話最好係先租 AirBnB 落腳後再搵地方搬，一來 AirBnB 租期短又可以隔山訂，二來哩度啲人都係比較上「舊式運作」，同埋你可以親身睇屋同埋周圍環境始終係好啲。
很有 heart 的日本菜 Octopus’ Garden
初初見評價咁高係有懷疑嘅，以為又係d 騙西人的壽司，但坐落食落都覺得非常唔錯。
裝修好可愛，又好有日本居酒屋感覺，好似番左鄉下。店內好多八爪魚的擺設，唔知係咪店長 Sada 師傅的吉祥物呢？
去食日本料理其實最緊要係睇佢塊手寫板，你會見到當季最新到的鮮魚，或者廚師推介的食品，叫一定無衰。
魴鮄魚薄切，味道鮮甜，好耐無食過咁好味嘅刺身。
壽司係幾合一，$45 的師傅選的壽司，$40 的吞拿魚sampling，加埋 jumbo negitoro 碎蔥吞拿卷，好滿足。我仲加左一件喉黑 nodoguro，真係唔係成日有得食，有得食好食。
食完 Sada 師傅送左兩杯梅酒俾我地，佢真係好好客，雖然一杯酒唔駛幾錢，但最緊要有心，可惜坐唔到吧檯，可能因為吧檯都留座俾坐日本人了。
我唯一有點不滿嘅，係豉油偏咸。
店子好難預約，仲要打電話都未必有人接，想試下就要加多少少耐性了。
（去廁所一轉原來有好多收穫，你又試下睇下你見到d 乜？）
Octopus’ Garden Restaurant
1995 Cornwall Ave, Vancouver, BC V6J 1C9
維多利亞生活 春夏秋冬 家居日常
作者：避世婆婆
Victoria 通常最熱都係得三幾個星期，仲要係至多廿幾卅度，不過今年真係大劑，六月尾連續幾日最熱可以過晒 36度，但係個 heat dome 一過咗就涼番正常番。哩度夏天唔似得香港咁潮濕，所以洗完衫可以好快晾得乾。如果住 apartment 可以响個廳度晾，咁樣又慳錢又唔駛俾個乾衣機逐次咁扯晒啲纖維，真係件衫都用得耐啲。其實呢，一年四季都可以响屋企晾衫，因為天涼時候屋內多數會開暖氣，雖然好多時都好乾燥，但係要記住用風扇移動吓啲空氣。唔覺唔覺真係可以俾少好多電費。
講開電費又講吓冬天室內暖氣嘅嘢。多數都係用電嘅，但係有啲屋同埋樓會用煤氣，舊啲嘅屋會仲係燒油。政府好鼓勵啲人着多件衫，唔好開個暖氣太大，廿一度左近就好，亦都唔好出街前較低佢，因為冬天唔開窗之餘又涷又濕對乜都唔好。
哩度夏天雨水比較少，五月到八月乾起嚟好容易有山火。因為好太陽果時出面總會有些少微風，所以响街行得耐唔覺唔覺好容易曬傷。通常九月中會開始涼，然後慢慢會多雨，所以有件有帽嘅風褸/雨褸係必需。有一件waterproof 嘅大褸就可以一直用到三四月。最好有帽嘅，因為你真係唔知佢幾時落雨，同埋啲大小雀仔會隨時「轟炸」。
Victoria 凍極有限，唔似得中部噤顛，就算落雪都唔會太大同埋至多一個星期左近就溶得七七八八。我住噤耐最大雪係1996，冬天有對防水防跣嘅 boots/鞋最好，基本上除非你冬天日日出街行好耐，唔係就可以用足好幾年。
講吓買衫褲鞋襪等等。如果唔一定要買全新嘅，哩度有好多二手市場同舖頭，仲有啲網上二手買賣 sites & apps，可以搵到又平又靚嘅嘢。去商場或者街舖買新嘢要另加銷售税12%。去二手舖好似起碼少咗5% GST (Goods and Services Tax) 定係 7% PST (Provincial Sales Tax)，唔係好記得，因為我好日都唔出吓街買嘢。 哩度嘅人衣著方面可以話好隨便，真係自己舒服就得，有啲習慣一出街就要化晒粧亦有啲着到古古怪怪，有時啲人見你件衫靚會話你知，但係未見過當面彈人嘅。
買家居用品 (dinnerware, small appliances etc) 都係可以响二手市場搵到平靚正嘅嘢。不時啲人搬屋會嫌啲嘢多過頭搵人要 (唔使錢)。本地嚟講，買賣二手好多都係基於「用得唔好嘥」，真係冇二手先去買新嘅，儘量由自己做起唔去浪費地球資源。
上面講買二手野，網上嘅有 FB market place, https://buff.ly/3EAbdil (web site), VarageSale (app with web access), kijiji (web site, possibly has app too but I don’t use this so not sure)，我知嘅係咁多，應該仲有唔少。
實體店舖有 Value Village, Salvation Army, Saint Vincent de Paul, WIN (women in need), 仲有其他冇咁大規模嘅舖頭。有啲人冇乜好做就鍾意去「尋寶」因為真係乜都有㗎。Value Village 比 SallyAnn 同 Saint Vincent 貴啲但係佢多好多選擇。早十年八年我响 Value Village 買咗件有 Gore-Tex 底嘅厚風褸，唔使十蚊著足噤多年。鍾意睇書嘅好有機會執到寶，除非有特別標價，最貴好似係七蚊一本，仲要買四送一。
維多利亞生活面面觀
作者：避世婆婆
Victoria 係 BC 省府，位於 Vancouver Island 之末。要去溫哥華可以揸車或者搭飛機過去。車連船加埋大概三個鐘，夏天通常 7am 到 10pm 每個鐘有一班船，秋冬就隔個鐘一班，同埋尾班係 9pm。詳情可以去佢個 site 度睇：https://buff.ly/3nufSeS
由於島上有農有田又有倉，就算打大風到船唔行得都唔怕糧荒。喜歡靜嘅人係好啱住。哩度嘅生活節奏比較慢，喺香港忙慣咗嘅會需要啲時間適應，但係住落時間長咗就會覺得舒服自在。只係香港人食慣嘅中菜館就冇乜，所以我哋間中會出去溫哥華食嘢。最近多咗唔少有 bubble tea 嘅舖頭同餐廳，但係間中見到有啲啱香港人嘅食店開咗唔到一兩年就做唔住，因為始終本土嘅人生活習慣同埋口味都好唔同。
住果方面，喺Victoria 租和買屋/樓的價錢通常都比溫哥華平些少，但係新屋舊屋都賣得好快，而近幾個月嘅租就好似貴過溫哥華些少，實在好多本地人追唔到啲屋價，亦都有唔少長期租客因為業主想/需要賺多啲而被迫遷 (reno-viction)。最近起咗又起緊唔少新嘅樓，有好幾棟 condo/apartment 講明只租不賣。如果你 Google “Victoria BC apartment rental”, 照計可以睇到單位大細同租金。成棟都係出租嘅通常包水唔包電。有啲私人獨立屋業主自住上層出租下層嘅都唔少，但係水電就有啲包有啲每個月大家俾一半。
間單講吓唔同嘅住宅類型：
Single detached house & duplex (獨立屋&孖屋）— 獨立屋好多都有起碼一個車房或者 carport (有蓋但係冇門), 但係亦都有啲用個 driveway 嚟泊車，甚至冇車位要泊喺屋前面。孖屋就通常一個大屋簷下左右兩伙，車位方面同獨立屋大同少異。屋主要負責所有维修，有草地嘅要勤剪草淋草，水電等等全部自己負責。如果租嘅話，包租嘅只負責屋本身嘅 upkeep 同 make sure 大型家電如雪柜爐頭等冇問題，出面花園草地係租客自理。
Townhouse & Condo (城市屋/排屋 & 樓層單位) — 哩啲有租有賣，要每月俾管理費，structure 嘅保險同水費已經 covered by the strata fee (管理費)，有啲包埋剪草同車位管理。管理費大約 $250 打上，有啲去到五六百蚊一個月都唔出奇，所以買哩類嘅記得問清楚。有啲只淮自住，賣價通常會平啲。
Apartment (俗稱柏文) — 哩啲多數係只租不賣，Victoria 有好幾棟新起嘅，但係租金都唔平。哩度有個 site 俾你望吓唔同地區嘅樓, 下面果個淨係租嘅: https://buff.ly/3BjFEYo
https://buff.ly/3pJ2uGm
Victoria 過暑假
作者：小編M
呢幾日睇到香港嘅奧運代表有超水準嘅表現真係睇到眼濕濕!
言歸正傳，小編M選擇 Victoria 係因為氣候以及多元化嘅活動，暑假已經開始一個月有多啦！我們仨去咗邊度玩呢？！
上山
最近行過 Joycelyn Hill Trail, 來回快行大概四小時，我哋一眾人傾下偈，Hea下食下嘢影下相，當然唔止四個鐘！夏天天氣類似香港嘅秋天，好清爽舒服，係最適合行山嘅天氣！路面情況就係乾地多石仔，所以需要穿著防滑嘅行山鞋。 (真係有跣親人嘅行山鞋㗎！) 上山上斜都有一半路程，但係波幅不算大，又有平路，沿路大部分時間都有大樹遮擋，不算艱辛。 到頂有四個view point 景色好正，下面就是 Goldstream！見到對岸最新嘅旅遊地標 ꟷ ‘Malahat Skywalk’ 㖭！但係沿路沒有洗手間㗎！記住慢慢飲水，唔係搵唔到廁所喎!
下海
另外，一個好期待嘅夏天活動就係去玩 paddle boarding，之前喺香港參加過一天親子體驗鴨仔團，當時喺海玩就大風浪啦，會較難取得平衡嘅。但是喺湖玩就正啦！湖面夠曬靜，好適合初學者玩！除此之外， 一家大細仲可以游水、 釣魚、Kayaking，喺湖邊野餐、踏單車、跑步、 散步等等！我哋最近去咗 Elk Lake！揸車去的話就要趁早，晏啲大概十一點左右開始人多好難搵車位！河邊有流動洗手間，常設嘅洗手間因為疫情關係就關閉咗，希望佢會好快開返！
Victoria 有好多湖，嚟到一定要去玩下！
大家睇奧運之餘得閒睇下呢度！下星期見啦！香港人加油！
Victoria駕駛tips
作者：小編M
唔好意思呀又遲咗！因為我未有 ideas
講咩好！接續上次講租樓，不如今次講下揸車
啦！利申我未有車牌㗎
！但係初到步嘅時候屋企老闆同我一齊嚟，我哋租咗車！
綜合朋友及在地香港人建議嘅駕駛tips：
Victoria Downtown 好多都係紅燈唔可以轉右，一定要睇清楚個牌先好轉，如果俾警察捉到，不單止食「牛肉乾」，仲會扣分。
有樣野叫 “4 way stop”, 車要停定，先到先行。
閃紅燈等於 “4 way stop”咁做。
閃綠燈可以照去，但要睇清楚。
每個省嘅閃綠燈都唔同，而喺Victoria嘅閃綠燈就係行人控制，意思就係如果有行人撳咗過馬路制，嗰個閃綠燈就會變做正常嘅綠燈，你依然可以照去，但係呢個正常綠燈亦代表好快會轉黃燈到紅燈。所以當你見到閃綠燈轉正常綠燈嘅話，就預備轉紅燈。
如果自己綠燈係左轉線，而又頭一架，不成文規定要駛出少少，大概半個到一個車位等轉左，否則後面會缽缽你。
仲有一樣好重要
綠燈左轉，一定 x 3要睇清楚對面有無車向前駛，安全情況吓先好左轉！仲要留意
左轉果邊有無行人過緊馬路！依邊行人是最大，你都要睇緊，讓讓行人！ 有車反而係最低等級！
Highway 最左線係快線，如非扒頭，不能霸住條線一直行。
有樣野叫 “HOV lane”，架車2人以上先可以用。 Victoria 冇 “HOV lane”，Vancouver 大部份嘅 HOV icon 會見到兩個人頭，就係架車一定要有兩個人以上。但係有陣時你會見到三個人頭嘅話，就係一定要三個人以上先至可以入呢條 lane。
如後面車推，即係嫌你慢，禮貌上要cut 線讓佢行先。
School zone 30km or 有 construction workers 開緊工，經過旁邊要慢駛。
如無需要，盡量唔好開高燈！（香港人好鐘意開高燈) 呢度開高燈係唔禮貌㗎! 因為通常開高燈或者不停閃高燈係想前面架車行快啲，而呢啲人有時亦都跟車會好貼，所以要小心。
消防水龍頭3米前後不能停車！(當時我哋醒唔起被抄牌了！)
切記揸車不能掂到電子用品，如電話，亦不能將電話放係腿上或可以接觸到既地方，呢樣捉得好嚴，理論上攞住野飲或食野都唔得!
仲有留意馬路側的單車專線。有時單車線，泊咗車，單車人士迫不得已駛出行車線。
如果香港嘅朋友仔係唔熟悉呢邊揸車嘅話，會建議喺呢度學番幾粒鐘先至安全喺路上駕駛。
以下係一啲教車嘅視頻可以參考下，或者你哋搵到啲更加好嘅資料 !