好多謝超過100位街坊支持7月31日街坊會在 Burnaby 的 Fraser Foreshore Park 舉行的「街坊圍爐燒」，大家係咪好盡慶呢？雖然天氣非常炎熱，但場地的樹蔭剛剛好遮住猛烈的太陽，因此都非常舒服。

呢度要多謝咁多位義工將呢個燒烤同樂日攪得有聲有色，要知道預備咁大型的聚會，統籌購買物資、安排人手車手都非常繁瑣，今次要非常多謝當中的骨幹成員小熊同 Yan 將整件事整理得井井有條，大家要俾d 掌聲！當然重有各單位的義工，有不少都出自己私伙來幫手；同埋當日負責廚房預料同煮食的各位，熱辣辣在爐火前整近百人的食物都幾辛苦呢。我地都要多謝有心嘅街坊煮左薏米水及請義工飲汽水，真係好有愛。

特別鳴謝周竪峰不辭勞苦將五城書展帶埋來，他選擇了不少頗堪細味的書到來俾街坊試閱，如果街坊有興趣買的話可以去到 https://1841.co 選購。

今次我地見到好多街坊來了加拿大都只係幾個月的光景，希望各位街坊可以藉著今次機會結識更多朋友，因為支援同經驗分享對新來的街坊融入加拿大有很重要的作用。